انقلاب بحرین کی نئی پیشرفت

اہل البیت (ع) نیوز ایجنسی ـ ابنا ـ کی رپورٹ کے مطابق بحرین کے دارالحکومت منامہ میں کویتی سفارتخانے کے فوجی اتاشی کرنل علی عساکر نے کہا کہ کویتی بحریہ نے عوامی تحریک کے دوران بحرین کی سمندری حدود میں قیام امن کا فریضہ سرانجام دیا ہے"۔

انھوں نے البتہ یہ نہیں کہا کہ بحرین کی سمندری حدود میں کویتی بحریہ کو کس قسم کے خطرات کا سامنا تھا جس کا اس نے بقول ان کے، مؤثر مقابلہ کیا ہے۔

دریں اثناء آل سعود کی قابض فوجوں کے ایک افسر نے بھی گذشتہ منگل کو کہا تھا کہ سعودی اور اماراتی فورسز بھی بحرین سے جارہی ہیں لیکن وہ پھر لوٹ کر اس ملک میں تعینات ہونگی جبکہ کویت نے اعلان کیا ہے کہ اس کی فوج بحرین میں حکومت اور انقلابیوں کے درمیان شروع ہونے والے مذاکرات اور اصلاحات کے عمل پر اس ملک سے جارہی ہے۔

بحرین کی انقلابی قوم نے جزیرہ نما شیلڈ فورسز کے بحرین میں آمد کو اس ملک پر جارحیت اور قبضہ قرار دیا ہے اور ان ملکوں سے بارہا کہا ہے کہ اس ملک کے اندرونی معاملات میں مداخلت نہ کریں اور اپنی فوجوں کے فوری انخلاء کو یقینی بنائیں۔

کویتی حکومت کو بحرین میں فورسز بھیجنے پر اندرونی طور پر بھی شدید مخالفتوں کا سامنا تھا۔